ಇಷ್ಟು ವರ್ಷ ಒಟ್ಟಾಗಿ ಕೆಲಸ ಮಾಡಿದಾಗ ನಮ್ಮ ಜೊತೆ ಚೆನ್ನಾಗಿ ನಡೆದುಕೊಂಡಿದ್ದ, ಮಹಿಳೆಯ ಜೊತೆ ಆತ ಅನುಚಿತವಾಗಿ ವರ್ತಿಸುವುದೇ ಇಲ್ಲ ಎಂಬಂತಹ ಮಾತುಗಳನ್ನು ಬೇರೆ ಆಡಲಾಗುತ್ತಿದೆ. ಆದರೆ ಪ್ರತಿಯೊಂದು ಅನುಭವವೂ ವೈಯಕ್ತಿಕವಾದದ್ದು ಮತ್ತು ವಿಶಿಷ್ಟವಾದದ್ದು. ಹೀಗಾಗಿ ಅನುಚಿತ ವರ್ತನೆ ತೋರಿದ ವ್ಯಕ್ತಿಯ ಹೆಸರು ಹೇಳಿದಂತಹ ಪ್ರತೀ ಮಹಿಳೆಯ ಮಾತುಗಳನ್ನು ಕುಬ್ಜವಾಗಿಸುವುದು ಎಷ್ಟು ಸರಿ? ಕಪ್ಪು– ಬಿಳುಪು ಎಂದು ಸರಳೀಕೃತ ನೆಲೆಯಲ್ಲಿ ನ್ಯಾಯ ನಿರ್ಣಯ ಮಾಡಲಾಗದು. ಎಲ್ಲಾ ಮಹಿಳೆಯರೂ ಒಳ್ಳೆಯವರು ಅಥವಾ ಎಲ್ಲಾ ಪುರುಷರೂ ಕೆಟ್ಟವರು ಎಂದೂ ನಾವು ಹೇಳುತ್ತಿಲ್ಲ.